Virki­lega spennandi lokamót fram­undan

 Það er óhætt að segja að virkilega spennandi og hörð keppni sé framundan bæði í tölti og skeiði en ekki síður í stigakeppninni. Mjög mjótt er á milli efstu sæta bæði í einstaklings- og liðakeppninni og úrslitin að öllu óráðin. Lífland mun bjóða áhorfendum frítt í höllina og að vanda verða frábærar veitingar í boði fyrir áhorfendur í HorseDay höllinni á vegum Veisluþjónustu Suðurlands.

Laugardaginn 30. mars var haldið Skeiðmót Meistaradeildar Líflands þar sem keppt var í Gæðingaskeiði og 150m skeiði. Mikið af fólki gerði sér ferð á Selfoss og tók þátt í því að styðja við helstu vekringa landsins og knapa þeirra. Hvorki knapar né áhorfendur létu veðrið hafa áhrif á sig en aðeins blés á mótsstað. Mótið hófst á Gæðingaskeiði en þar voru þeir félagar Konráð Valur Sveinsson og Kastor frá Garðshorni sem tryggðu sér öruggan sigur með einkunnina 8.24. 

Í öðru sæti voru Jóhann Ragnarsson og Þórvör frá Lækjarbotnum með einkunnina 8.04 og Árni Björn Pálsson og Álfamær frá Prestsbæ með einkunnina 7.92 í því þriðja. Það var svo lið Top Reiter sem sigraði liðakeppnina í Gæðingaskeiðinu nokkuð örugglega með 54 stig og tryggði sér góða stöðu í liðakeppninni.

Að loknu Gæðingaskeiði tóku við virkilega spennandi kappreiðar þar sem tímarnir voru með glæsilegasta móti miðað við árstíma. Leikar fóru svo, eftir hörku spennandi lokasprett, að Gústaf Ásgeir Hinriksson og Sjóður frá Þóreyjarnúpi stóðu uppi sem sigurvegarar en þeir fóru á tímanum 14.18 sek. sem er virkilega glæsilegur árangur. Í öðru sæti voru það Jóhann Kristinn Ragnarsson og Þórvör frá Lækjarbotnum á tímanum 14.40 sek. og í því þriðja Árni Björn Pálsson á Ögra frá Horni I og fóru þeir á tímanum 14.56 sek.

Enn á ný voru það liðsmenn Top Reiter sem sigruðu liðakeppnina með 43 stig og þar með er liðið búið að stimpla sig inn í toppbaráttuna í liðakeppninni fyrir lokamótið en þeir hafa sigrað hana síðastliðin 3 ár.

Glódís Rún Sigurðardóttir leiðir einstaklingskeppnina með 34.5 stig en mikil spenna ríkir milli efstu knapa og nóg eftir af stigum í pottinum. Hún hefur haldið öruggri forystu í allan vetur og megum við búast við því að hún mæti vel undirbúin til leiks og stefni á ekkert nema sigur. Það eru þó nokkrir knapar sem enn geta gert atlögu að sigri og má búast við að þeir leggi allt í sínar sýningar til að ná toppsætinu.

Staðan í einstaklingskeppni

1. Glódís Rún Sigurðardóttir 34.5
2. Aðalheiður Anna Guðjónsdóttir 30
3. Jakob Svavar Sigurðsson 30
4. Gústaf Ásgeir Hinriksson 22.75
5. Árni Björn Pálsson 21

Það er svo lið Ganghesta/Margrétarhofs sem leiðir liðakeppnina með 239 stig en rétt á hæla þeirra eru lið Hestvits/Árbakka og Top Reiter sem eiga einnig möguleika á að sigra Meistaradeildina 2024.

Staðan í liðakeppninni

1. Ganghestar / Margrétarhof 239
2. Hestvit / Árbakki 234.5
3. Top Reiter 215.5
4. Hjarðartún 206
5. Þjóðólfshagi / Sumarliðabær 168
6. Hrímnir / Hest.is 166
7. Austurkot / Pula 156

Það má segja að deildin hafi sjaldan verið jafn spennandi fyrir lokakvöldið og hún er nú en það er allavega ljóst að það er gríðarlega sterk keppni framundan á föstudaginn og verða þar bestu töltarar landsins ásamt fljótustu vekringunum. Í fyrra voru það Árni Björn Pálsson og Kastanía frá Kvistum sem sigruðu töltið en Konráð Valur Sveinsson og Kjarkur frá Árbæjarhjáleigu II sigruðu flugskeiðið. Munu þau mæta aftur til leiks og endurheimta sigurinn? Það kemur allt í ljós á föstudaginn! Þetta vill enginn láta framhjá sér fara!

Að þessu sinni er það Lífland sem býður áhorfendum frítt í höllina. Eins og áður verða frábærar veitingar í boði fyrir áhorfendur í HorseDay höllinni á vegum Veisluþjónustu Suðurlands og er gestum bent á glæsilegt hlaðborð. Ef pantað er fyrir fram er í kaupbæti frátekið sæti á besta stað í stúkunni. Húsið opnar klukkan 17:00 og hefst keppni stundvíslega klukkan 19:00

Nánari upplýsingar um veitingarnar má nálgast á info@ingolfshvoll.is.

Þeir sem ekki komast þá að sjálfsögðu mælum við með að allir tryggi sér áskrift hjá ALENDIS og fylgist með í beinni útsendingu.