Bloggið kemur upp um tryggingasvindlara

Dæmi eru um að upp komist um íslenska tryggingasvindlara í kjölfar gáleysislegra skrifa þeirra á bloggi og öðrum netsíðum. Einn svikarinn gekk svo langt að gorta sig á alheimsnetinu af vátryggingasvindli sem hann hafði kokkað upp. Talið er að tryggingafélögin tapi milljörðum á tryggingarsvikum árlega.

Norska tryggingafélagið Gjensidige hefur sparað sér greiðslur á tryggingabótum upp á rúma þrjá milljarða íslenskra króna síðustu fjögur ár með því að nýta sér upplýsingar af Facebook. Þótt nær hálf íslenska þjóðin sé á Facebook eru hvorki VÍS né TM að nýta sér hana til að ljóstra upp um tryggingasvikara.

Kjartan Vilhjálmsson, framkvæmdastjóri tjónaþjónustu TM, segir að á síðustu árum hefðu tugir tryggingasvika komist upp hjá félaginu vegna þess að fólk skrifar eitt á netið eða bloggsíður - en segir allt annað þegar það hyggst sækja tryggingabætur til TM.

Hann bendir á tilvik þar sem ungur karlmaður bloggaði um strangan undirbúning sinn fyrir erfiða keppnisíþrótt - á sama tíma og hann sótti sér slysabætur til TM vegna heilsutjóns. Í enn öðru dæminu sveik ung kona bætur út úr félaginu - og komst upp um hana vegna reglulegra skrifa á netinu

Kjartan segir engin ástæða til að ætla að tryggingasvik séu minni hér en í Evrópu.