Innlent

Síðast gaus í tvö ár

Gufustrókurinn í gosinu sem hófst í Eyjafjallajökli í morgun sést vel frá Vestmannaeyjum. Mynd/Ólafur Óskar Stefánsson
Gufustrókurinn í gosinu sem hófst í Eyjafjallajökli í morgun sést vel frá Vestmannaeyjum. Mynd/Ólafur Óskar Stefánsson
Lítið er vitað um gossögu Eyjafjallajökuls og er einungis vitað um tvö gos á sögulegum tíma í jöklinum. Það fyrra varð árið 1612 og það seinna 1821 til 1823. Gosið sem hófst 20. mars sl. á Fimmvörðuhálsi var austan við jökulinn.

Fram kemur á vef Jarðvísindastofnunar Háskóla Íslands að litlar heimildir séu um gosið árið 1612 en nokkrar um gosið á 19. öld. Þar segir að bæði virðast hafa verið fremur lítil. Gosið 1821 til 1823 varð í tindi fjallsins, að því er virðist í norðvesturhluta öskjunnar. Jökulhlaup komu undan Gígjökli meðan á gosinu stóð.

Loftmynd af hæsta hluta Eyjafjallajökuls frá 6. ágúst 1994. Norður er upp. Myndin er tekin af vefsvæði Jarðvísindastofnunar Háskóla Íslands. Hægt er að sjá myndina í stærri upplausn með því að smella á hana.
Eyjafjallajökull er eitt stærsta eldfjall á Íslandi og eitt af fáum sem flokka má sem eldkeilu, en sú gerð eldfjalla er algeng víða um heim. Fjallið er um 1660 metra hátt og ílangt austur-vestur. Undirhlíðarnar eru brattar og að miklu leyti gerðar úr móbergi frá jökulskeiðum. Ofan 500 til 600 metra er brattinn minni, að fram kemur á vef Jarðvísindastofnunnar.

Ofan 900 til 1000 metra hæðar er fjallið þakið jökli. Efst á Eyjafjallajökli er lítil askja, svokallaður sigketill, 2-2,5 kílómetra í þvermál. Askjan er þakin jökli en eftir ummerkjum að dæma er hún grunn. Á vef Jarðvísindastofnunnar segir að askjan sé opin norðurátt þar sem brattur skriðjökull, Gígjökull, fellur niður á láglendi. Nokkrir klettar standa upp úr jöklinum á börmum öskjunnar. Þeirra á meðal eru Innri og Fremri Skoltur, Goðasteinn, Guðnasteinn og Hámundur sem er hæsti tindur jökulsins.

Kort Landmælinga Íslands af Eyjafjallajökli.






Tengdar fréttir

Gosið hefur áhrif á flug

Gosið í Eyjafjallajökli mun hafa áhrif á millilandaflug en flug til og frá Íslandi mun þó ekki liggja niðri. Hjördís Guðmundsdóttir, upplýsingafulltrúi Flugstoða, segir að miðað við veðurspár mun öskusvæðið ná alla leið til Noregs. Flugleið Icelandair til Noregs muni breytast en flugið ekki falla niður.

Blaðamönnum snúið við nærri Moshvoli

Blaðamönnum var snúið við um kílómeter frá Moshvoli vegna umbrotanna í Eyjafjallajökli. Blaðamenn hafa fylgst grannt með umbrotunum en hætta fylgir gosi af þessu tagi. Fréttamaður á fréttastofu Stöðvar 2 og Vísis var á leiðinni inn í Þórsmörk í fylgd með lögreglunni. Lögreglumennirnir tóku hins vegar enga áhættu og sneru þeim við.

Mikið mistur yfir Eyjafjallajökli

Enn sést ekkert til gossins í Eyjafjallajökli. Skjálftahrina hófst í jöklinum um ellefuleytið í gærkvöld og um fjögurleytið í nótt bárust þær upplýsingar frá Veðurstofunni að mælar bentu til þess að gos væri hafið.

Eldgos virðist hafið í Eyjafjallajökli

Mælingar benda til þess að eldgos sé hafið undir suðvesturhluta Eyjafjallajökuls. Að sögn Veðurstofunnar benda mælingar til þess að órói fari vaxandi og allar líkur á því að gos sé hafið.

Gera skarð í hringveginn til að bjarga Markarfljótsbrú

Unnið er að því að gera skarð í þjóðveginn skammt frá Markarfljótsbrú. Dofri Eysteinsson, framkvæmdastjóri Suðurverks, segir að þetta sé gert til að reyna að verja Markafljótsbrú fyrir hlaupinu sem nú kemur niður vegna eldgossins í Eyjafjallajökli.

Gos staðfest í Eyjafjallajökli - gufubólstrar sjást

Tvær tilkynningar hafa borist um gufubólstra fyrir ofan Eyjafjallajökul frá flugvélum. Önnur vélin var 40 mílur í suðri og sá bólstra í hánorðri. Hin var 60 mílur fyrir norðaustan jökul og sá bólstra í suðvestur átt.

Um 700 manns þurfa að yfirgefa heimili sín

Tekin hefur verið ákvörðun um rýmingu í Fljótshlíð og í Landeyjum þar sem eldgos virðist hafið í Eyjafjallajökli. Víðir Sigurðsson hjá Almannavörnum segir að verið sé að koma skilaboðum til fólks á svæðinu. Um 700 manns eru búsettir á svæðinu sem rýma skal en um sömu áætlun er að ræða og virkjuð var þegar gaus á Fimmvörðuhálsi.

Myndir af gosstöðinni

Hér má sjá myndir úr vefmyndavél sem staðsett er á Dufþaksbraut á Hvolsvelli. Nú er talið fullvíst að gos sé hafi í Eyjafjallajökli sem eigi upptök sín í miðbungu jökulsins.

Lokað á milli Hvolsvallar og Skóga

Lögregla hefur lokað veginum frá Hvolsvelli að Skógum vegna jarðskjálftahrinunnar í Eyjafjallajökli. Ef gos hefst undir jökli má búast við hlaupi í Markarfljóti.

Flugsamgöngur samkvæmt áætlun

Að óbreyttu munu flugsamgöngur haldast samkvæmt áætlun þrátt fyrir að merki hafi sést um að gos sé hafið í Eyjafjallajökli. Þrátt fyrir að merkin hafi sést á mælum Veðurstofunnar hafa menn ekki séð gosið. Þá bendir heldur ekkert til að hlaup sé hafið í ám.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


×