Innlent

Kona um sextugt sagði Tinnu Rós að skjóta sig í höfuðið

Tinna Rós kann víst að skipta um ljósaperur.
Tinna Rós kann víst að skipta um ljósaperur. Mynd / Facebooksíða Tinnu Rósar
„Svo sannarlega og ég hef fengið að kynnast því," svarar Tinna Rós Steinsdóttir, blaðamaður á Fréttablaðinu sem skrifaði pistil í Fréttablaðið á laugardaginn undir fyrirsögninni „Ósjálfbjarga og elska það" þegar útvarpsmenn í Reykjavík síðdegis á Bylgjunni spurðu hana hvort það væri dýrkeypt að viðra skoðanir sínar um jafnréttismál.

Líklega hefur pistillinn ekki farið framhjá mörgum en þar viðraði Tinna Rós, að því er virðist umdeilda kenningu sína, um að jafnréttisbaráttan væri að ganga riddaramennskunni að dauðri.

Ýmsir lögðu orð í belg. Meðal annars fékk Tinna Rós ógeðfelld skilaboð frá konu um sextugt sem sagði henni að hún ætti að skjóta sig í höfuðið. Tinna ákvað að fara með þá orðsendingu auk annarrar til lögreglu í því skyni að kæra einstaklingana fyrir líflátshótanir. Málið er þó ekki komið í kæruferli en er á borði lögreglunnar.

Aðrir gagnrýndu pistil Tinnu Rósar með yfirvegaðri hætti. Meðal annars skrifaði rithöfundurinn Óttar M. Norðfjörð háðsádeilu með fyrirsögninni „Karlremba og elska það" sem birtist meðal annars á femíniska vefritinu Knúz.is.

Tinna Rós segir í viðtali við útvarpsmennina að hugmyndin að pistlinum hafi kviknað í vinkonuhópnum sínum. „Og, já, ég hélt að ég væri að gera þetta á skoplegan hátt, í frekar ýktri útgáfu, en það virðist hafa lagst svona illa í landann. Eða hluta hans."

Tinnu Rós blöskrar umræðan á netinu. Hún fagnar skoðanaskiptum en afþakkar fúlar pillur reiðra lesenda. „Ég hef fengið ábendingu um að ég sé heimsk og löt og að ég eigi engan rétt á því að lifa út af skoðunum mínum. Sumir hafa skrifað að þeir vonist til þess að ég eigi engin börn því það væri hræðilegt að eiga mig sem foreldri," segir Tinna Rós þegar hún lýsir viðbrögðunum við pistlinum.

Spurð hverjir það séu sem séu að ráðast á hana með svo harkalegum hætti, en hún er sérstaklega spurð hvort það séu femínistar í því samhengi, svarar Tinna Rós að það sé ógerlegt að flokka fólk niður með þessum hætti. „Hver er ekki femínisti? Þetta eru skilaboð jafnt frá körlum og konum á öllum aldri," segir hún.

Tinna Rós tekur hinsvegar sérstaklega fram í viðtalinu að hún hafi einnig fengið gríðarlega mikið af jákvæðum viðbrögðum. Þannig hafi hún fengið viðbrögð frá konum sem séu sammála viðhorfinu en þora ekki fyrir sitt litla líf að viðra þau af ótta við viðbrögðin að hennar sögn.

Hún tekur sem dæmi skilaboð frá konum sem hafa ákveðið að hafa börnin sín heima frekar en að hafa þau á leikskóla. „Mér finnst það vond jafnréttisbarátta að fólk megi ekki velja sína leið í lífinu," bætir hún við.

Tinna segir viðbrögðin nú ekki slá sig út af laginu. „Ég var með hugmynd að heilalausum pistli fyrir næsta blað, en ég skrifa hann líklega ekki." Tinna bætir svo við að lokum: „Ég sé ekki eftir því að hafa birt þennan pistil og það er frábært hvað hann fékk mikil viðbrögð, það er eiginlega stórkostlegt. En ég mun ekki láta þetta hefta mig í því að viðra mínar skoðanir."

Hægt er að hlusta á viðtalið við Tinnu Rós hér. Pistilinn sjálfann má lesa í viðhengi hér fyrir neðan.


Tengdar fréttir

Ósjálfbjarga og elska það

Erlendur blaðamaður greip mig á rölti niður Laugaveginn á dögunum. Hún var að skrifa grein fyrir bandarískt tímarit um stefnumótamenningu Íslendinga og bað um mitt álit. Ég jós úr viskubrunni mínum á þessu sviði í dágóðan tíma og bölvaði því að riddaramennskan væri steindauð hérlendis. Þegar hún spurði mig af hverju ég héldi að það væri var ég þó alveg mát.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


×