Innlent

Nágrannadeilur í Garðabæ: Sátt náðist á samstöðufundi

SB skrifar
Mynd frá samstöðufundinum í gær. Um 60-70 manns mættu á fundinn.
Mynd frá samstöðufundinum í gær. Um 60-70 manns mættu á fundinn. Mynd/Eva

Sátt hefur náðst í nágrannadeilunum í Garðabæ. Fjölskyldan sem flúði heimilið sitt getur nú flutt aftur heim, bílskúrinn fær að rísa og kærur verða dregnar til baka.

Um hundrað manns voru á sáttafundinum í gærkvöldi þegar mest var. Andrés Helgi Valgarðsson, skipuleggjandi fundarins, segir að niðurstaða fundarins sé sú að það myndaðist grundvallarsátt í málinu.

Forsaga málsins er sú að Brynja Scheving og fjölskylda hennar flúðu heimili sitt eftir að deilur við nágranna fór úr böndunum. Þessar deilur eiga rætur sínar að rekja til þess þegar Brynja og fjölskylda hennar ætluðu að reisa bílskúr en það var nágrannafjölskyldan ósátt við. Í síðasta mánuði sauð upp úr en þá sakar Brynju nágranna sinn um að hafa beitt líkamlegu ofbeldi.

Mótmælaskilti á samstöðufundinum.Mynd/Eva

„Kallinn á móti ákvað að gefa eftir enda hefur almenningsálitið sýnt honum að hann sé kominn í óverjandi stöðu," segir Andrés Helgi. Hann tekur þó fram að líkamsárásarkæran frá Brynju verði ekki dregin til baka. „Það sem skiptir mestu máli er að það myndaðist grundvallarsátt í málinu þannig að fólk getur búið heima hjá sér meðan dómstólar dæma."

Nágrannaerjurnar í Garðabænum hafa vakið landsathygli og segir Andrés það vissulega merkilegt að tugir bæjarbúa hafi mætt á samstöðufundinn og lagt sitt af mörkum til að leysa úr málinu. „En auðvitað er leiðinlegt að málin séu komin á það stig og kannski vantar löggjöf varðandi úrræði í svona málum."



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


×