Rigningasumar samkvæmt Fóelluvötnum

Fóelluvötn á Sandskeiði eru nú þurr. Veit það á rigningasumar sunnanlands samkvæmt gamalli þjóðtrú. Páll Bergþórsson veðurfræðingur tekur ekki undir þá spá þó margt sé skynsamlegt í þjóðtrúnni. Hann segir frost í jörðu eftir veturinn ráða vatnsstöðunni og að hún segi ekki til um veðurfarið í sumar.

Efri- og Neðri- Fóelluvötn eru samsafn smátjarna og polla á Sandskeiði ofan við Reykjavík. Í lestarferðum yfir Hellisheiði fyrrihluta sumars fylgdust bændur vel með vatnsstöðu þeirra og huguðu jafnvel fyrr að slætti ef þau voru þurr, það þótti fyrirboði votviðrasumars.  

Fóelluvötn eru þurr núna og samkvæmt þjóðtrúnni veit það á rigningasumar sunnanlands. Öfugt við það veit það á gott sumar ef vatnsstaða er góð í Fóelluvötnum fyrrihluta sumars.

Páll Bergþórsson veðurfræðingur og fyrrverandi veðurstofustjóri hefur heyrt um þessa þjóðtrú en hefur ekki trú á því að staða vatnanna hafi nokkuð með veðurfar að gera.

„Nú er tiltölulega þurrt hérna. Ástæðan fyrir því er sú að ég held að það var mjög mildur vetur og lítið frost í jörðu,  sem annars hefði getað haldið uppi vatninu svo það sígi ekki niður. Ég sé nú ekki beinlínis neitt samhengi þarna á milli að það verði eitthvað rigningarsumar fyrir því," segir Páll og bætir við að um eftirtektaverða tilviljun sé að ræða.

„Það er nú þannig með rigninguna að hún er ekki eins reglulega og hitinn. Rigningasumur geta komið bæði á hlýinda- og kuldaskeiðum.  Ég sé ekki neitt samhengi þarna á milli," segir Páll. 

„Ég þekki hliðstætt dæmi úr öðru tilfelli, það er um frostavetur og hlýtt sumar. Það hefur lengi verið trú að ef það er gott og hlýtt sumar verði mikill frostavetur næsti vetur, þetta hefur alls ekki reynst vera þannig á þessari og síðustu öld. Þegar það eru hlý sumur er yfirleitt hlýr vetur á eftir."

Eitt dæmi sé þó til, árið 1880 þegar sumarið var einstaklega hlýtt og miklar frosthörkur veturinn eftir.

„Þetta verður mönnum náttúrulega afar minnisstætt og þeir hneigjast til þess að halda að þetta sé einhver regla. Það kann að vera þannig með vötnin líka, ég þori ekki að segja um það.

Það er mjög margt sem er mjög skynsamlegt í þjóðtrúnni. Menn voru mjög eftirtektarsamir með veður, sérstaklega til skemmri tíma," segir Páll.