Russel Crowe á leið til landsins til að leika Nóa

Stórstjarnan Russel Crowe mun leika aðalhlutverkið í Noah, kvikmynd eftir Darren Aronofsky sem tekin verður hér á landi í júlí. Þetta kemur fram í tilkynningu frá framleiðendum myndarinnar en Crowe hafði áður verið orðaður við hlutverkið. Önnur stjarna, Liam Neeson, er einnig sagður líklegur til þess að fara með hlutverk.

Aronofsky og Crowe hafa ekki unnið saman áður en einn handritshöfunda Noah átti einnig heiðurinn af Gladiatior, mynd Ridley Scotts sem gerði Crowe að stórstjörnu. Hann fékk síðan Óskarsverðlaun fyrir myndina A Beautiful Mind. Darren Aronofsky er með virtari leikstjórum samtímans og á að baki myndir á borð við The Wrestler og Black Swan.

Noah, fjallar eins og nafnið gefur til kynna, um Nóa og örkina hans. Myndin verður frumsýnd í mars árið 2014.