Segir engan farþega hafa átt bókaða ferð með ferjunni Akranesi á föstudaginn

Gunnlaugur Grettisson, framkvæmdastjóri Sæferða, segir í samtali við Vísi að aðeins einn dagur muni falla niður í ferðum ferjunnar Akraness í kringum Verslunarmannahelgina. Ferjan mun því ekki sigla á milli Akraness og Reykjavíkur á föstudaginn næstkomandi.

Enginn ferja mun koma í staðinn og verða því þeir, sem ætluðu að nýta sér ferjuna, að leita annarra leiða þennan eina dag. Enginn farþegi átti bókaða ferð með ferjunni á föstudaginn.

Gunnlaugur segir ferjuna vera eins og strætó, fólk mæti þegar það ætlar sér yfir fjörðinn.

„Það varð ekki röskun fyrir neinn sem átti bókað,“ segir Gunnlaugur.

Gunnlaugur segir að þeir hafi í júní beðið um leyfi til að leggja niður ferðina þennan dag.

„Við siglum alla virka daga og við óskuðum eftir því í júní að fá frí þennan eina dag til að geta farið í þetta verkefni ef þetta yrði heimilað og það var orðið við því góðfúslega. Enda erum við að sigla mjög mikið af aukaferðum upp á Skaga. Við erum að sigla fjórar ferðir á dag og svo erum við að sigla um helgar,“ segir Gunnlaugur.

Gunnlaugur segir að þau hjá Sæferðum séu afar ánægð með niðurstöðuna og þetta verði spennandi verkefni.