Sunderland hóf lífið í B-deildinni með jafntefli

Sunderland, sem féll úr ensku úrvalsdeildinni í vor, gerði í kvöld jafntefli við Derby, 1-1, er nýtt tímabil hófst í ensku B-deildinni.

Derby komst yfir í leiknum með marki Bradley Johnson en Lewis Grabban, sem kom til Sunderland í sumar, jafnaði metin úr vítaspyrnu. Bæði mörk leiksins voru skoruð í fyrri hálfleik.

Sunderland hafði verið í ensku úrvalsdeildinni í tíu ár samfleytt þar til liðið féll í vor en Sunderland endaði í neðsta sæti deildarinnar.

Nottingham Forest vann í hinum leik kvöldsins 1-0 sigur á Millwall með marki Barrie McKay á 41. mínútu.

Viðureign Fulham og Norwich verður sýnd í beinni útsendingu á Stöð 2 Sport klukkan 13.50 á morgun.