Wenger hefur áhyggjur af sjálfstrausti Mkhitaryan

Arsene Wenger, knattspyrnustjóri Arsenal í ensku úrvalsdeildinni, viðurkennir að hann hefur áhyggjur af sjálfstrausti Henrikhs Mkhitaryan eftir dapra daga á Old Trafford.

Armeninn gekk í raðir Arsenal á dögunum í sléttum skiptum fyrir Alexis Sánchez en Mkhitaryan hefur ekki átt sjö dagana sæla að undanförnu. Hann komst aldrei almennilega í gang á sínu hálfu öðru ári sem leikmaður Manchester United.

„Auðvitað hefur maður áhyggjur af því að þetta hafi áhrif á hann. Þetta er samt nýtt tækifæri fyrir hann. Það sem maður vill í lífinu er annað tækifæri og ég er viss um að hann mun nýta sér það,“ sagði Wenger á blaðamannafundi fyrir undanúrslitaleikinn gegn Chelsea í deildabikarnum sem fram fer í kvöld.

Mkhitaryan má ekki spila á móti Chelsea í kvöld þegar að fram líða stundir mun hann fá að vera í uppáhaldsstöðunni sinni inn á miðjunni.

„Hann getur spilað mismunandi stöður. Ég lít á hann fyrst og fremst sem kantmann en ég er að hugsa um að spila honum á miðjunni. Kannski ekki bara sem tíu heldur mögulega aftar á vellinum,“ sagði Arsene Wenger.