"Við erum ekki vændiskonur"

Tvær breskar starfsstúlkur á kampavínsklúbbnum VIP í Austurstræti segja erfitt að sitja undir ásökunum um að þær séu vændiskonur og að mansal sé stundað í tengslum við staðinn.

Þær vilja opinbera afsökunarbeiðni frá þeim sem hafa viðhaft slík ummæli og hafa ráðið sér lögfræðing til að fylgja málinu eftir. Hrund Þórsdóttir ræddi við þær á VIP Club í dag.

Ilona og Emily komu til Íslands síðastliðinn þriðjudag. Þær hafa gegnt starfinu víða í sex og níu ár og segjast hamingjusamar. Starfið sé skemmtilegt og þær hafi ágætlega upp úr því.

„Við vinnum við að skemmta. Við tölum við karlmenn, látum þeim líða þægilega, dönsum fyrir þá og syngjum. Eða bara það sem gerir þá ánægða.“

Viðskiptavinir greiða fyrir tíma í einrúmi með þeim og þá er farið afsíðis á efri hæð staðarins. Þær segja konur jafn velkomnar og karlmenn. „Við færum upp með konu alveg eins og karlmönnum. Við mismunum engum.“

Aðspurðar segjast þær stundum beðnar að gera hluti sem þær vilji ekki gera. „Auðvitað kemur það fyrir. Það gerist alls staðar í dansbransanum.“

Í Fréttablaðinu var haft eftir starfsmanni að í boði væri að fara afsíðis með starfsstúlkum og þar gætu þær veitt viðskiptavinum það sem þeir vildu. Tíu mínútur voru sagðar kostar 20 þúsund krónur. Ilona og Emily neita þessu.

„Við dönsum og förum ekki inn í herbergi til að gera neitt annað. Þetta snýst um félagsskap okkar, það er allt og sumt. Félagsskapur, dans, kampavínsglas eða flaska.“

Þær segjast skilja að fólk hafi skoðun á starfseminni en að erfitt sé að sitja undir lögregluheimsóknum og því að vera kallaðar vændiskonur. Þær fara fram á opinbera afsökunarbeiðni frá þeim sem hafa viðhaft slík orð.

„Auðvitað ætlum við að verjast þessu. Hvað á maður annað að gera?.“

Þær stöllur hafa ráðið sér íslenskan lögmann og hyggjast fylgja málinu eftir. Þær vilja taka fram að ýmsar rangfærslur hafi verið í umfjöllun fjölmiðla um málið.

„Við erum enskar, við erum ekki vændiskonur og við erum ekki frá Slóveníu. Við kunnum mjög vel við okkur hér. Okkur er ekki haldið gegn vilja okkar og við vinnum fyrir vingjarnlegt fólk.