2500 börn þurfa á meðferð að halda vegna offitu

Tvö þúsund og fimm hundruð börn á Reykjavíkursvæðinu þurfa á meðferð að halda vegna offitu en talið er að fimm prósent íslenskra barna séu of feit. Búið er að opna göngudeild á Barnaspítala Hringsins sem ætlað er að reyna að hjálpa þessum börnum.

Á Landspítalanum hefur staðið yfir rannsókn í rúm fimm ár á meðferð fyrir offitu barna og fjölskyldur þeirra. Árangurinn af meðferðinni hefur verið mjög góður og hefur hið opinbera nú veitt tíu milljónum til þess að koma á laggirnar göngudeild sem sinna á þessum málum en hún tók til starfa í gær.

Deildin var opnuð í gær en hún er árangur fimm ára rannsóknarvinnu starfsmanna á Barnaspítalanum. Íslendingar eru fjórða feitasta Evrópuþjóðin og hefur yfirlæknir á Barnaspítalanum sagt að mikil offita meðal barna kalli minni lífgæði og lífslíkur yfir þjóðina. Ódýrast og árangurríkast sé að grípa inn í þessa holskeflu offitu sem nú ríður yfir á meðan sjúklingarnir séu á barnsaldri. Hann segist fullviss að deildin muni fljótt borga sig upp.

„Við vorum að fá á fjárlögum tíu milljónir til þess að stofna meðferðarúrræði fyrir offitu barna og unglinga. Til þess að setja fjárhæðina í samhengi þá eru þetta fjórar hjáveituaðgerðir, eða magaminnkunaraðgerðir eins þær eru oft kallaðar," segir Ragnar Bjarnason, yfirlæknir á Barnaspítala Hringsins.

Það rannsóknarstarf sem þegar hefur farið fram á spítalanum hefur skilað mjög góðum árangri. Það taki því skamman tíma fyrir deildina að borga sig upp. Auk þess sem starf hennar mun draga úr líkamlegum og andlegum þjáningum of feitra barna.

Fyrst í stað mun teymið verða skipað lækni, sálfræðingi og næringarfræðingi en ætlunin er að fleiri sérfræðingar muni koma að meðferðinni svo sem íþróttafræðingar.