Ólíklegt að pókermót sé lögbrot

Afar hæpið er að kalla það sem fram fór á pókermótinu fjárhættuspil í laganna skilningi, enda borgaður aðgangseyrir og keppt um verðlaunafé eins og tíðkast í ýmsum íþróttum, segir Brynjar Níelsson hæstaréttarlögmaður. Því sé ólíklegt að lögbrot hafi verið framið á pókermótinu.

„Þetta fyrirkomulag er alþekkt í öllum íþróttum, það getur ekki verið bannað bara af því að það er verið að spila póker eða eitthvað annað spil,“ segir Brynjar.

Hann bendir á að peningaverðlaun séu veitt í ýmsum greinum; bridds, skák og fleiru. Þar fái sigurvegarinn verðlaunafé sem sé tekið af þeim aðgöngueyri sem þátttakendur greiði.