23 ára aldurstakmark í miðborginni um helgar?

Í pistli sem Björn Bjarnason, dómsmálaráðherra, ritaði á heimasíðu sinni í gær veltir hann fyrir sér samstarfi mótshaldara og lögreglu um verslunarmannahelgina. Hann segir að reynsluna af því samstarfi og þeim ákvörðunum sem teknar voru, meðal annars á Akureyri, eigi að nýta þegar hugað sé að leiðum til að draga úr óreglu og ólátum í miðborg Reykjavíkur.

„Þegar rætt er um atburði verslunarmannahelgarinnar og því velt fyrir sér, hvers vegna allt fór fram á frekar skikkanlegan hátt, má ekki gleyma nánu samstarfi mótshaldara og lögreglu," segir Björn. „Viðbúnaður lögreglu var í samræmi við það, sem menn væntu á hverjum stað og hún vann náið með þeim, sem báru ábyrgð á mannfagnaði víða um land." Hann víkur síðan að því fyrirkomulagi sem viðhaft var á Akureyri, þar sem ungmennum á aldrinum 18 til 23 ára var meinaður aðgangur að tjaldsvæðum bæjarins og segir hann að sú ákvörðun hafi dregið mjög úr líkum á vandræðum í bænum.

„Besta leiðin til að auka næturöryggi í miðborg Reykjavíkur er að kalla alla til ábyrgðar," segir Björn. Hann bætir því við að vegna umræddra ráðstafana á Akureyri hafi ýmsir sagst hafa misst spón úr aski sínum. „Viðleitni til að sporna við hömlulausum veitingarekstri í miðborginni kann að koma við buddu einhvers. Þar eru þó minni hagsmunir í húfi en öryggi borgaranna, sem seint verður metið til fjár," segir ráðherrann.