Pálmi, Jón Ásgeir og Shearer vilja kaupa Newcastle

Eins og greint var frá á Vísi hafa athafnamennirnir Pálmi Haraldsson og Jón Ásgeir Jóhannesson hug á því að gera kauptilboð í enska knattspyrnuliðið Newcastle. Viðræður munu vera langt komnar án þess að skrifað hafi verið undir samning. Í kvöldfréttum Stöðvar 2 var svo greint frá því að Alan Shearer, fyrrverandi leikmaður Newcastle, sé með þeim félögum í liði.

Pálmi Haraldsson vildi í samtali við Vísi hvorki játa því né neita að hann ætti í viðræðum við núverandi eiganda um kaup á félaginu. „Newcastle er flottur klúbbur, með flottan stjóra og ég hef haldið lengi með liðinu," sagði Pálmi og hló.

Mike Ashley, er eigandi íþróttavöruverslana í Bretlandi og hann keypti Newcastle í júní síðastliðinn. Ekki er ólíklegt að Ashley þekki til þeirra Pálma og Jóns Ásgeirs, enda hafa þeir verið áberandi í smávöruverlsun á Bretlandi síðustu misserin. Ashley keypti meirihluta í Newcastle á 134 milljónir punda í lok maí. Þess má geta að Eggert Magnússon og Björgólfur Guðmundsson keyptu knattspyrnuliðið West Ham í nóvember á síðasta ári fyrir 85 milljónir punda.

Í síðustu viku greiddi Ashley niður 30 milljónir punda af 80 milljón punda láni sem hvíldi á félaginu. Þetta er talið gefa því undir fótinn að hann sé að reyna að gera félagið söluvænlegra í augum fjárfesta.

Newcastle er gríðarlega sterkt knattspyrnufélag, það 13. stærsta í heiminum í dag. Stuðningsmenn félagsins eru mjög hollir sínum mönnum og yfirleitt er yfirfullt á velli félagsins, St. James' Park.