Garðar Hólm ætlar að verða söluhæstur hjá Remax í Evrópu

Garðar Hólm sölufulltrúi hjá Remax Center var annar söluhæstur hjá Remax-fasteignasölunum í Evrópu á sameiginlegum lista sem gefinn var út í apríl. Listinn er gefinn út á tveggja mánaða fresti en í júní hafði Garðar færst niður um nokkur sæti.

Garðar, sem er rekstrarfræðingur og hefur starfað hjá Remax í tæp fimm ár, segist hafa verið að skipta yfir í atvinnuhúsadeildina og að tilfæringarnar sem því fylgdu hafi gert það að verkum að hann hafi fallið niður um nokkur sæti. Hann segir þó mun blómlegri tækifæri í atvinnuhúsageiranum og stefnir að því að verða söluhæsti einstaklingur á listanum innan skamms.

Aðspurður um lykilinn að velgengninni segist hann vinna mikið. Hann segir nauðsynlegt að vera lipur í samningatækni og fá bæði kaupanda og seljanda til að verða sammála um verð. Eins segir hann mikilvægt að verða sér úti um góð sambönd og sækjast eftir eignum á skrá. Garðar vill ekki gefa upp mánaðartekjur sínar en heimildir Vísis herma að þær hlaupi á milljónum. Garðar segir menn geta haft það mjög gott í þessum geira.

Remax var stofnað í Bandaríkjunum fyrir 35 árum og starfa um 120.000 sölumenn hjá fyrirtækinu um allan heim. Listum yfir velgengni sölumannanna er skipt upp og segir Garðar erfitt að komast inn á Ameríkulistann. Nýlega birtist viðtal við Garðar í tímaritinu Remax international þar sem fjallað er um velgengni hins íslenska sölufulltrúa.