McRae meðal þeirra sem létust í þyrluslysi

Lögregla í Skotlandi hefur staðfest að Colin McRae, fyrrverandi heimsmeistari í rallakstri, og sonur hans hafi verið meðal þeirra fjögurra sem létust í þyrluslysi í gær. Þyrlan skall til jarðar í skóglendi nærri heimili McRaes í Lanark.

Þyrlan var í eigu McRae og var flakið svo illa brunnið að nokkurn tíma tók að bera kennsl á þá sem um borð voru. Colin McRae var 39 ára og sonur hans, Johnny, sex ára en auk þeirra létust tveir vinir feðganna, annar 37 ára og hinn sex ára, í slysinu.

Á ferlinum varð McRae heimsmeistari 1995 og þrívegis í öðru sæti eftir það. Hann vann tuttugu og fimm mót á ferli sínum frá 1987 til 2004.