Tillaga biskups um staðfesta samvist samþykkt á Kirkjuþingi

Samþykkt var á Kirkjuþingi fyrir stundu að lýsa yfir stuðningi við ályktun kenningarnefndar þjóðkirkjunnar um að prestum yrði heimilt að staðfesta samvist samkynhneigðra ef þeir kysu svo og ef Alþingi breytti lögum þar að lútandi.

Það var biskup Íslands, Karl Sigurbjörnsson, sem bar fram tillöguna fyrr í vikunni og eftir að hún hafði hlotið umfjöllun hjá allsherjarnefnd kirkjunnar var gengið til atkvæðagreiðslu um hana á Kirkjuþingi í morgun. Málið var samþykkt samhljóða með 27 atkvæðum, einn þingfulltrúi sat hjá og einn var fjarverandi vegna veikinda.

Í tillögu biskups var einnig gert ráð fyrir að þjóðkirkjan stæði við hefðbundinn skilning á hjónabandinu sem sáttmála karls og konu og var sá hluti hennar einnig samþykktur.

Þessi samþykkt þýðir að nú er það í höndum Alþingis að breyta lögum þannig að prestum verði heimilt að staðfesta samvist samkynhneigðra en stefnt er að því samkvæmt sáttmála ríkisstjórnarflokkanna.