Hæstiréttur staðfestir gæsluvarðhald í nauðgunarmáli

Hæstiréttur staðfesti í dag að tveir Litháar sem grunaðir eru um að hafa nauðgað konu í í húsasundi í miðbæ Reykjavíkur um helgina skuli sæta gæsluvarðhaldi til mánudagsins 19. nóvember. Héraðsdómur Reykjavíkur hafði áður úrskurðað þá í gæsluvarðhald vegna rannsóknarhagsmuna.

Fram kemur í gæsluvarðhaldsúrskurðinum að konan hafi lagt fram kæru á hendur mönnunum á sunnudagsmorgun eftir að hún leitaði til neyðarmóttöku Landspítalans vegna nauðgana. Var konan með augljósa áverka.

Konan lýsir hrottafenginni árás mannanna og er rétt að vara viðkvæma við því sem hér á eftir kemur.

Konan lýsir því svo að hún hafi verið stödd á skemmtistað í bænum og þar hafi tveir menn komið til hennar og hafi annar þeirra farið að ræða við hana á ensku. Eftir að skemmtistaðnum hafi verið lokað hafi mennirnir gengið með henni upp Laugaveginn. Þau hafi gengið inn í húsasund við gatnamót Laugarvegs og Vitastígs en þar hafi mennirnir ráðist á hana með ofbeldi.

Hafi annar þeirra, sem hún nefnir þann stærri, hrint henni upp á húdd bifreiðar sem í húsasundinu var þannig að hún féll við. Hann hafi haldið henni upp við bifreiðina og byrjað að slá hana í andlitið, rífa í hár hennar og sveigja höfuð hennar aftur.

Á meðan henni var haldið hafi annar þeirra tekið niður um hana buxurnar. Hún hafi barist á móti af öllu afli en mennirnir hafi náð að toga hana niður í mölina. Þar hafi þeir togað buxur hennar niður að ökklum og rifið upp um hana peysu, bol og brjósthaldara. Hafi sá stærri reynt að setja getnaðarlim sinn í leggöng hennar og kvaðst hún muna eftir miklum sársauka. Hinn maðurinn hafi einnig reynt að setja getnaðarlim sinn í leggöng hennar og hafi sá stærri haldið henni fastri með hálstaki á meðan og reynt að troða lim sínum í munn hennar.

Sá hafði síðan farið klofvega yfir hana og slegið limnum í andlitið á henni þar til hún hafi neyðst til þess opna munninn. Hann hafi þá troðið honum upp í munn hennar. Hinn maðurinn hafi að þessu búnu sest öfugur yfir hana og sett afturendann upp við andlit hennar. Hann hafi sett lim sinn í munn hennar og sagt við hana á ensku að henni yrði sleppt eftir þrjár mínútur ef hún yrði samvinnuþýð. Kvað hana minna að sá maður hafi fengið sáðlát í munn hennar á meðan höfði hennar var haldið föstu. Mennirnir hafi að þessu loknu sleppt henni lausri. Tók hún fram að þeir hafi hlegið að henni bæði á meðan á þessu stóð og á eftir.

Samkvæmt upplýsingum frá slysadeild var konan með rispur á baki og víða á líkamanum eins og eftir möl eða sand. Sandur og laufblöð hafi verið í hári hennar og fatnaði. Þá hafi hún verið með áverka á kynfærum og er vísað um það til vottorðs neyðarmóttöku.

Út frá öryggismyndavélum á skemmtistaðnum var hægt að hafa uppi á mönnunum og voru þrír menn handteknir á sunnudag. Einum þeirra var sleppt þegar ljóst hafi verið að hann tengdist ekki málinu. Mennirnir tveir sem sitja í gæsluvarðhaldi neituðu að hafa haft kynmök við konuna og hafa borið fyrir sig minnisleysi um atburði.