Kvarta undan káfi á Kastrup

Það ríkir allt annað en gleði meðal danskra flugþjóna vegna nýrra öryggisreglna sem tóku gildi á Kastrup-flugvelli í dag. Samkvæmt þeim eiga verðir í öryggishliðum að leita með höndunum á öllum farþegum, þar á meðal í klofi og á milli brjósta.

Fram kemur á vef Nyhedsavisen að um sé að ræða nýjar alþjóðlegar reglur sem sé komið á til tryggja að fólk komist ekki með sprengiefni um borð í flugvélar, en hryðjuverkamenn hafa verið gripnir með sprengjur í bæði skóm og nærfötum.

Talsmenn flugþjóna eru hins vegar æfir og telja gengið alltof nálægt fólki. „Það er búið að kanna okkur út frá öryggissjónarmiðum. Ég hef ekki séð neina sönnun fyrir því að þetta komi í veg fyrir hryðjuverk," segir Verner Lundtoft Jensen, formaður félags flugþjóna, og vísar þar til káfsins.

Upphaflega stóð til að leita á fólki með sérstökum skönnum en eftir tilraunir í sumar þar sem öryggisverðir leituðu á fólki með höndunum ákváðu flugvallaryfirvöld á Kastrup að nota fremur þá aðferð. „Flestir telja að þetta ítarlega eftirlit veiti þeim öryggi. En við fáum líka eina og eina athugasemd um að við séum of nærgöngul. Það finnst okkur leitt en það er því miður nauðsynlegt,“ segir yfirmaður upplýsingamála á Kastrup-flugvelli.

Haft er eftir hryðjuverkasérfræðingi sem unnið hefur með bandarískum flugmálayfirvöldum að líkamsleit sem þessi sé ekki rétta leiðin. „Hvað verður það næst? Ætla þeir að banna fartölvur því það geta leynst sprengjur í þeim eða þurfum við að vera nakin í flughöfnum því föt geta innihaldið efni sem geta valdið sprengjuhættu? Þeir ættu frekar að kenna starfsmönnum að bera kennsl á hryðjuverkamenn," segi Bogdan Dzakovic, sérfæðingur í hryðjuverkavörnum.