Barnaníðingurinn Ágúst Magnússon býr á höfuðborgarsvæðinu

Barnaníðingurinn Ágúst Magnússon sást í Reykjanesbæ í gærdag. Hann mun þó ekki búa í bænum heldur er hann með dvalarstað á höfuðborgarsvæðinu. Ágúst ók um á grænni Toyotu Corollu sem er í eigu föður hans.

Í frétt Víkurfrétta síðan í gærkvöldi kom fram að sést hafi til Ágústar á Hafnargötunni í Reykjanesbæ og á vappi í kringum Tónlistarskóla bæjarins. Foreldrar í Reykjanesbæ hafa áhyggjur af börnum sínum og voru nemendur í Myllubakkaskóla vöruð við ferðum barnaníðings og beðin um að gefa sig ekki á tal við ókunnuga samkvæmt Víkurfréttum.

Brynja Árnadóttir skólastjóri í Myllubakkaskóla segir að einhver misskilningur sé í gangi en hún heyrði fyrst af málinu í morgun. „Það hefur engin hjá okkur rætt við börnin vegna málsins. Ég hef talað við alla hér í skólanum og það kannast enginn við það," sagði Brynja.

Hún vissi ekki hvaðan þessi orðrómur kæmi en kennarar í skólanum hafa ekki orðið varir við Ágúst í kringum skólann.

Hjördís Árnadóttir félagsmálastjóri í Reykjanesbæ tekur í sama streng og segir málið ekki hafa komið inn á borð til sín. „Ég hef heyrt þessar fréttir eins og aðrir. Það er ekkert einsdæmi að þegar menn koma úr afplánun og aftur út í samfélagið að það verði ákveðin viðbrögð, sem ég tel eðlilegt," segir Hjördís sem segir mikilvægt að foreldrar séu vakandi.

„Ég skil það að foreldrar vilji vera á verði og vonandi eru þeir það alltaf," segir Hjördís sem ekki hafði fengið neina ábendingu frá foreldrum vegna Ágústar í dag.

Samkvæmt heimildum Vísis er búið að útvega Ágústi dvalarstað á höfuðborgarsvæðinu og því er hann ekki fluttur í Reykjanesbæ. Það var í höndum fangelsismálastofnunnar og félagsmálayfivalda í Reykjavík að útvega honum húsnæði, en hann fékk ekki að klára afplánun sína á áfangaheimilinu Vernd þar sem barnaníðingum er það nú óheimilt.

Árið 2004 var Ágúst dæmdur fyrir að níðast á sex drengjum og hóf í kjölfarið afplánun á Litla Hrauni.

Þann 1.febrúar fékk hann hinsvegar reynslulausn og þarf að tilkynna reglulega um ferðir sína eftir því sem Vísir kemst næst. Einnig má hann ekki stunda staði þar sem börn eru í tómstundum.

Bíllinn sem Ágúst var á í gær er í eigu föður hans en það er græn Toyota Corolla og hefst skráningarnúmer hans á bókstöfunum DN.