Eyðilagði sportbílinn og hljóp undan löggunni

Ökuferð ölvaðs ökuníðings á glæ nýjum opnum sportbíl, endaði á steinvegg við Rauðarárstíg í Reykjavík í nótt. þá tók við spretthlaup undan laganna vörðum, sem náðu honum skömmu síðar.

Upphaflega ætlaði lögregla að hafa tal af manninum, sem hafði verið að reykspóla á Laugaveginum. Hann sinnti því ekki og ók á ofsa hraða upp Hverfisgötuna og hætti lögregla eftirförinni í öryggisskyni. Skömmu síðar lenti hann á steinveggnum.

Maðurinn reyndist ölvaður og kona, sem var með honum í bílnum var flutt á Slysadeild vegna eymsla í baki. Bíllinn er talinn ónýtur og ökumaðurinn er í steininum.