Lífið

Íslendingur í miðjum stríðsátökum í Líbanon

Einar Örn Einarsson
Einar Örn Einarsson /Myndin er fengin að láni á bloggsíðu Einars.

Einar Örn Einarsson er þrítugur hagfræðingur. Hann starfar sem framkvæmdarstjóri á veitingastaðnum Serranos sem hann á með vini sínum. Einar er nú staddur í Líbanon að ferðast og fór yfir til Sýrlands í morgun. Hezbollah hafa lýst yfir stríði og bloggar Einar um ástandið eins og hann upplifir það.

„Það er alveg magnað við þessi ferðalög mín að ég á það til að skilja eftir mig sviðna jörð. Ég flaug frá Cancun daginn fyrir fellibyl, eldfjall fór að gjósa þegar ég keyrði framhjá því í El Salvador og daginn sem ég var á leiðinni yfir landamærin til Kambódíu, þá var framið valdarán í Taílandi og Thaksin var steypt af stóli," skrifar Einar sem keyrði frá Líbanon yfir til Sýrlands með 5 sýrlenskum verkamönnum og bílstjára.

„Og hvað gerist sama dag? Jú, Hezbollah hafa lýst yfir stríði í Líbanon."

Á bloggsíðu Einars má sjá að ástandið í Líbanon hefur verið mjög eldfimt og með tilheyrandi verkföllum og fjölda hermanna á götum úti.

„Í fyrradag í Trípolí var okkur tjáð að það væri verið að skipuleggja mikil mótmæli í Beirút og Trípolí og þegar ég fór útúr húsi snemma í gærmorgun var herinn mættur á aðaltorgið í Trípolí, tilbúinn fyrir allt," skrifar Einar.

Þegar Einar kom svo heim eftir daginn í kvöld var augljóst að ástandið var að versna. Búið er að loka flugvellinum og ástandið á götunum orðið mjög slæmt.

„Í gær ákvað svo ríkisstjórnin að stöðva símakerfi sem er rekið af Hezbollah og við það varð allt vitlaust. Nasrallah, leiðtogi Hezbollah, kom fram í sjónvarpi og lýsti yfir stríði á hendur stjórnvöldum. Í dag og í kvöld hafa svo staðið yfir bardagar á milli súnníta og shíta í borginni. Það er vonandi fyrir þessa blessuðu þjóð að þetta sé ekki upphafið á einhverju slæmu."

Hægt er að fylgjast með Einar á bloggsíðu hans.






Fleiri fréttir

Sjá meira


×