Heimskur þjófur á ferð í Hafnarfirði

Hann var heldur seinheppinn þjófurinn sem hugðist ræna verðmætum úr bíl við Sundhöll Hafnarfjarðar í síðustu viku.

Eftir því sem segir í frétt Fjarðarpóstsins braust hann inn í bílinn á meðan eigandinn hafði stungið sér til sunds og hirti úr honum verðmæti. Þegar eigandinn kom svo að bílnum eftir sundsprettinn hringdi hann á lögregluna en á meðan hann beið kom hann auga á verðmætin í næsta bíl, honum til mikillar furðu.

Þjófurinn hafði þá ákveðið að skella sér í sund eftir verknaðinn og var hann handtekinn á staðnum. Hann viðurkenndi brot sitt við yfirheyrslu hjá lögreglu.