Enginn á lífi eftir ferjuslysið á Filippseyjum

Óttast er að rúmlega þúsund manns hafi farist þegar fellibylur fór yfir Filippseyjar um helgina. Ferju með hátt í níu hundruð manns um borð hvolfdi í veðurofsanum og aðeins er vitað um fjóra sem komust lífs af. Við vörum við myndunum sem fylgja þessari frétt.

Minnst hundrað fimmtíu og fimm drukknuðu í skyndiflóðum eða grófust undir aurskriðum sem urðu þegar fellibylurinn fór yfir eyjarnar.

Þrátt fyrir viðvaranir um að fellibylur væri í aðsigi fór ferja með 845 farþega og hundrað tuttugu og eins manna áhöfn úr höfn í Manilu síðdegis á föstudaginn. Áfangastaðurinn var Cebu eyja. Í upphafi var talið að 724 hefðu verið um borð í ferjunni en eigandi hennar upplýsti síðdegis að töluvert fleiri hafi verið um borð.

Talstöðvarsamband rofnaði aðfaranótt laugardags. Björgunarskip náðu að ferjunni rúmum sólahring síðar og þá fannst enginn á lífi við flakið.

Aðeins er vitað um fjóra sem komust lífs af. Ættingjar þeirra eru æfir útgerð skipsins og yfirvöldum.

Gloria Arroyo, forseti Filippseyja, var á ferð um Bandaríkin þegar fellibylurinn fór yfir. Hún hélt þegar heim og krefur strandgæsluna um skýringar á því afhverju ferjan fékk að fara úr höfn.