Pjakkur tekinn af lífi eftir að hafa bitið konu

Dobermanhundurinn Pjakkur slapp frá eiganda sínum í Hveragerði þann 4.júlí. Einum og hálfum tíma síðar var búið að lóga hundinum. Pjakkur hafði í millitíðinni ráðist á konu í bænum og bitið. Konan hlaut skurð eftir árásina. Eigandinn er ósáttur en lögregla segir þetta eðlilegar verklagsreglur. Kvartað hafði verið undan Pjakki áður, og hann því talinn hættulegur.

Búið er að stofna minningarsíðu um Pjakk þar sem málið er reifað í stuttri grein. Þar kemur fram að Pjakkur hafi sloppið frá eiganda sínum en tíu mínútum síðar hafi fyrrverandi unnusta hans hringt og sagt hundinn hafa komið til sín. Þegar hún svo kemur með hundinn mæta tveir lögregluþjónar á svæðið og tilkynna eigandanum að þeir séu mættir til þess að láta lóga Pjakki, þar sem hann hafi ráðist að konu og bitið.

Eigandinn og fyrrum unnustan fara síðan með hundinn ásamt lögregluþjónunum upp á dýraspítalann að Stuðlum þar sem honum er lógað. Allt þetta gerist á innan við einum og hálfum klukkutíma.

„Hundurinn stekkur á vegfaranda og bítur hann. Samkvæmt verklagsreglum hjá okkur er farið með hann til dýralæknis þar sem hann er aflífaður. Það hefur verið kvartað undan þessum hundi áður, þar sem hann hefur ógnað fólki," segir Oddur Árnason yfirlögregluþjónn hjá lögreglunni á Selfossi sem kannaðist við málið.

Oddur telur mikilvægt að eigendur beri ábyrgð á dýrum sínum og segir það ekki hafa verið gert í þessu tilviki. Hann segir málið þó enn vera til rannsóknar og segir eigandann verða kallaðan fyrir. „Þetta verður samt ekki tekið fram fyrir þau kynferðis- og líkamsárásarmál sem eru inni á borði hjá okkur. Þetta mál er í farvegi."

Oddur segir einnig að eigandi hundsins hafi verið viðstaddur þegar honum var lógað og verið samþykkur þeirri aðgerð.

„Ef hætturlegir hundar ganga lausir og bíta fólk, þá aflífum við þá og erum ekkert að tvínóna við það," segir Oddur aðspurður hvort þetta hafi ekki tekið nokkuð skamman tíma.