Þorsteinn Már Baldvinsson, stjórnarformaður Glitnis hefur sent frá sér yfirlýsingu varðandi það hvort samþykki stærstu hluthafa í Glitni hafi verið fengið áður en Seðlabankinn boðaði til blaðamannafundar þar sem tilkynnt var um yfirtöku ríkisins á 75 prósenta hlut í bankanum. Þorsteinn sagði í Kastljósi í gær að ekki hafi verið fengið samþykki stærstu hluthafa áður en boðað var til fundarins en Seðlabankinn vísaði þessu á bug í tilkynningu fyrr í dag.
Yfirlýsing Þorsteins fer hér á eftir í heild sinni:
Vegna fréttatilkynningar frá Seðlabanka Íslands um boðun blaðamannfundar sl. mánudag vill undirritaður koma eftirfarandi á framfæri:
Samkvæmt þeim upplýsingum sem ég m.a. hef, var atburðarásin með eftirfarandi hætti:
1. Davíð Oddsson, seðlabankastjóri, hringdi í Glitni kl. 8:45 og
tilkynnti að búið væri að boða blaðamannafund kl. 9:15 í
Seðlabankanum og óskaði eftir nærveru forstjórans á þeim fundi.
2. Klukkan 8:55 hringdi undirritaður í Ingimund Friðriksson,
seðlabankastjóra, og spurði hvort búið væri að boða til
blaðamannafundar. Hann sagði svo ekki vera.
3. Klukkan 8:58 hringdi Davíð Oddsson og tjáði mér að það væri rangt hjá
Ingimundi að ekki væri búið að boða til blaðamannafundar. Það væri
búið að boða til blaðamannafundar og ítrekaði hann ósk sína um að
forstjóri Glitnis væri viðstaddur fundinn.
4. Klukkan 9:16 birtist á visir.is frétt þess efnis að búið væri að boða
til blaðamannafundar í Seðlabankanum.
5. Klukkan 9.22 hringdi Ingimundur Friðriksson seðlabankastjóri og
undirritaður sagðist í því augnabliki vera kominn með undirskrift
stærsta hluthafans.
6. Klukkan 9.24 var tölvupóstur með undirskrift stærsta hluthafans
sendur til Seðlabankans.
Það að Seðlabanki Íslands sendi ekki frá sér tölvupóst fyrr en kl. 9:25, þar sem formlega er boðað til blaðamannafundar kl. 9:20, breytir því ekki að búið var að boða menn munnlega til blaðamannafundar t.d. sbr. frétt á visir.is kl. 9:16. Ég stend því við fyrri orð mín um aðdraganda þessa máls.
Nú skiptir mestu að allir aðilar snúi bökum saman og leiti leiða til þess að takast á við þá áskorun sem íslenskt efnahagslíf stendur frammi fyrir um þessar mundir. Ég legg áherslu á að vinnufriður skapist fyrir starfsmenn og stjórnendur Glitnis og mun því ekki tjá mig frekar um samskipti mín við starfsmenn Seðlabanka Íslands.
Þorsteinn Már Baldvinsson
Stjórnarformaður Glitnis
Athugasemd frá fréttastjóra:
Fréttin á visir.is sem vísað er til í 4. lið yfirlýsingar Þorsteins Más Baldvinssonar, var ekki skrifuð kl. 09.16 heldur var um að ræða uppfærða frétt sem var skrifuð á þeim tíma um að FME hefði stöðvað viðskipti með bréf Glitnis í Kauphöllinni. Ritstjórn barst póstur frá Seðlabanka Íslands kl. 9.25 og var fréttin uppfærð þá. Í öllum látunum gleymdist hins vegar að uppfæra tímann á fréttinni.
