Kröfur aukast um opinbera rannsókn í Bretlandi vegna Íslands

5. nóvember 2008 09:31

Kröfur um opinbera rannsókn á því hvernig bresk stjórnvöld brugðust við hruni íslensku bankanna gerast nú æ háværari á breska þinginu. Íhaldsflokkurinn gerir nú kröfu um slíka rannsókn en áður hafa Frjáslyndir demókratar gert slíka kröfu.

Í frétt á vef breska blaðsins Times er fjallað um endurgreiðslur til þeirra sem áttu Icesave-reikinga í Bretlandi. Þar kemur fram að Mark Hoban, fjármálaráðherra í skuggaráðuneyti Íhaldsflokksins, hafi óskað eftir víðtækri opinberri rannsókn.

Hoban vill að rannsóknin nái til þess hvernig bæði ríkisstjórn Bretlands og fjármálaeftirlit landsins stóðu að málum þegar íslensku bankarnir urðu gjaldþrota. Einnig vilja íhaldsmenn að undanfari aðgerða stjórnvalda verði rannsakaður nákvæmlega.

Þessar kröfur koma í kjölfar frétta í breskum fjölmiðlum um að breska fjármálaráðuneytið hafi fylgst með þróuninni á Íslandi í sex mánuði áður en bankakerfi Íslands hrundi. Það leiddi til mikils taps hjá breskum sparifjáreigendum sem og sveitarstjórnum.

Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.