Gift virðist orðið eignalaust

Fjárfestingafélagið Gift, sem fór með fjármuni Eignarhaldsfélags Samvinnutrygginga, virðist vera orðið eignalaust þegar eignasafn félagsins í fyrra er skoðað og borið saman við afdrif þeirra eigna upp á síðkastið.

Sérstakt fulltrúaráð skipaði í fyrra skilanefnd í félaginu sem átti að endurgreiða um það bil 50 þúsund fyrrverandi tryggingatökum Samvinnutrygginga hundrað þúsund krónur að meðaltali á mann. Ekkert hefur orðið af þeim endurgreiðslum og sterkar vísbendingar eru um að að svo verði ekki.

Þá átti að stofna öflugan líknar- og menningarsjóð en ekkert hefur bólað á honum. Enn fremur vekur það athygli að eftir að skilanefndin var skipuð til að standa að endurgreiðslunum hefur Gift staðið áfram í fjárfestingum. Meðal annars keypti félagið stóran hlut í Kaupþingi rétt fyrir síðustu áramót en sá hlutur er nú gufaður upp. Stjórnarformaður Giftar sagði af sér fyrir viku og liggur ekki fyrir hvort einhver hefur tekið við því starfi.