Sjö lögreglumenn leituðu á slysadeild

Sjö lögreglumenn þurftu að leita á slysadeild í nótt eftir grjótkast frá mótmælendum, samkvæmt upplýsingum frá lögreglunni á höfuðborgarsvæðinu. Sá sem mest slasaðist fékk þungt höfuðhögg þegar múrsteini var kastað í höfuðið á honum og var fluttur burt frá Stjórnarráðinu, þar sem mótmælin fóru fram, i sjúkrabíl. Hann var á sjúkrahúsi til eftirlits í nótt. Geir Jón Þórisson yfirlögregluþjónn segir að maðurinn hafi verið með hjálm en hafi engu að síður fengið mikið högg. Hinir sex lögreglumennirnir slösuðust minna.