FSA staðfestir viðræður um Icesave

Fréttastofan hefur fengið það staðfest hjá breska fjármálaeftirlitinu (FSA) að viðræður áttu sér stað milli FSA og Landsbankans um að koma Icesave-reikningunum í breska lögsögu s.l. haust.

FSA segir að þessar viðræður hafi ekki leitt til neins samkomulags og vill að öðru leyti ekki tjá sig um málið enda sé það starfsregla hjá embættinu að ræða ekki um mál einstakra félaga/fyrirtækja sem heyra undir það.

Eins og fram hefur komið í fréttum er nú deilt um hvort fyrrgreindar viðræður hafi yfirhöfuð farið fram. Fréttastofa hefur séð tvö bréf tengd málinu. Annarsvegar það bréf sem birt var í Kastljósi þar sem bankastjórar Landsbankans segja að bankinn eigi í viðræðum við FSA um hraðvirka dótturfélagavæðingu vegna Icesave.

Bréfið er stílað á Seðlabanka Íslands og dagsett sunnudaginn 5. október. Þar benda bankastjórarnir á þrjá hluti sem gerst höfðu þann daginn og þeim fannst að Seðlabankinn ætti að vita af. Þar á meðal eru viðræður bankans við Hector Sants, forstjóra FSA í Bretlandi um að framkvæma „hraðvirka dótturfélagavæðingu" Icesave reikninganna í Bretlandi.

„Við viljum koma þessum upplýsingum á framfæri og því breytta mati sem þetta getur leitt til á stöðu Landsbankans," segir í bréfinu sem undirritað er af þeim Halldóri J. Kristjánssyni og Sigurjóni Þ. Árnasyni forstjórum bankans.

Hitt bréfið sent af starfsmanni Landsbankans til starfsmanns breska fjármálaeftirlitsins, aðfararnótt 6. október, þar sem meðal annars kemur fram að Landsbankinn hafi verið í sambandi við Hector Sants hjá FSA fyrr um kvöldið. Í þessu bréfi er rætt um 200 milljón punda greiðslu til útibús bankans í Bretlandi til þess að mæta útstreymi fjármagns frá útibúinu auk þess sem leggja þurfi Heritable bankanum til 53 milljónir punda. Farið hafi verið fram á fyrirgreiðslu frá Seðlabankanum af þeim sökum.

„Okkur skilst að Seðlabankinn muni taka afstöðu til málsins á morgun og við munum millifæra upphæðirnar um leið og við fáum þær frá bankanum," segir í bréfinu.

„Ég vona að þessar ráðstafanir mæti skilmálunum sem ræddir voru fyrr í kvöld við þig og Hr. Hector Sants," segir að lokum.

Nokkru síðar lýsti Björgólfur Thor Björgólfsson því í Kompásþætti að flýtimeðferð hefði verið í boði og að Seðlabankanum hafi verið kunnugt um það.

Þessu neitaði Seðlabankinn í yfirlýsingu og sagði Björgólf fara með rangt mál, ekkert hafi verið minnst á flýtimeðferð vegna Icesave.