Innlent

Ræða endurnýjanlega orkugjafa

Katrín Júlíusdóttir, iðnaðarráðherra.
Katrín Júlíusdóttir, iðnaðarráðherra. Mynd/Auðunn Níelsson
Utanríkisráðherra Sameinuðu arabísku furstadæmanna, Sheikh Abdullah bin Zayed al-Nahyan, er hér á landi í dag. Hann mun funda með Katrínu Júlíusdóttur, iðnaðarráðherra, í fjarveru Össurar Skarphéðinssonar, utanríkisráðherra, en Össur sækir ráðherrafund EES ríkja í Brussel.

Fram kemur í tilkynningu frá utanríkisráðuneytinu að frá árinu 2006 hafa Ísland og Sameinuðu arabísku furstadæmin átt samstarf á sviði endurnýjanlegra orkugjafa, meðal annars hafa íslenskir sérfræðingar veitt ráðgjöf í jarðhitamálum. Þá býðst íslenskum námsmönnum að sækja nám við Tækniháskóla í Sameinuðu arabísku furstadæmunum og jafnframt hafa fjárfestar lýst áhuga á að taka þátt í jarðhitaverkefnum með Íslendingum.

Sameinuðu arabísku furstadæmin eru eitt fjögurra ríkja sem bjóða sig fram til að hýsa höfuðstöðvar IRENA sem verður ný alþjóðleg stofnun um endurnýjanlega orku.

Sheikh Abdullah bin Zayed al-Nahyan mun einnig hitta Svandísi Svavarsdóttur, umhverfisráðherra, í dag. Þá mun hann snæða hádegisverð í boði forseta Íslands, Ólafs Ragnars Grímssonar og heimsækja Hellisheiðarvirkjun.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


×