Hoppaðu þá helvítið þitt

Reiður vegfarandi hrinti í vikunni manni fram af brú í Gunagzhou í Kína. Maðurinn sagðist ætla að fremja sjálfsmorð vegna skulda en hafði staðið á brúarhandriðinu í fimm klukkustundir.

Eins og við var að búast var öll umferð stöðvuð og gríðarleg bílalest myndaðist í aðkeyrslunni að brúnni.

Loks brast einn ökumanninn þolinmæðin. Hann smeygði sér framhjá lögregluþjónum sem voru á staðnum og gekk að sjálfsmorðskandidatinum.

Rétti honum höndina. Kandidatinn rétti einnig fram höndina. Þeir tókust í hendur og ökumaðurinn henti honum framaf brúnni. Fallið var átta metrar.

Eftir það sneri hann sér að mannfjöldanum og heilsaði að hermannasið. Hann uppskar mikil fagnaðarlæti.

Lögreglan var hálfbúin að fylla loftdýnu fyrir neðan brúna og á henni lenti hinn skuldugi umferðartefjari. Hann slapp með minniháttar meiðsli.

Lögreglunni þótti hinsvegar rétt að eiga orðastað við ökumanninn óþolinmóða.