Orkuveitan bíður í ofvæni eftir svörum

Ef Evrópski fjárfestingarbankinn (EIB) afgreiðir ekki þrjátíu milljarða króna lán til Orkuveitu Reykjavíkur (OR) setur það áætlanir fyrirtækisins um virkjanauppbyggingu í fullkomið uppnám. Ef lánið fæst verður Hellisheiðarvirkjun kláruð en ákvarðanir um byggingu Hverahlíðarvirkjunar hafa hins vegar verið settar á salt þangað til fjármögnun verkefnisins er að fullu lokið.

Þrátt fyrir vilyrði neitaði EIB um miðjan júlí að ganga frá láninu til OR vegna óvissu í íslensku efnahagslífi. Lánið var upphaflega eyrnamerkt síðasta áfanga Hellisheiðarvirkjunar og fyrri áfanga Hverahlíðarvirkjunar. Þessar áætlanir hafa nú breyst.

„Þó svo að þetta lán komi frá EIB munum við aðeins klára stækkunina á Hellisheiðarvirkjun en við munum ekki fara af stað með Hverahlíðarvirkjun fyrr en búið er að fjármagna alla framkvæmdina,“ segir Hjörleifur Kvaran, forstjóri OR. Hann segir að ef lánið frá EIB fáist verði mun léttara en annars hefði verið að sækja það lánsfé sem upp á vanti til að klára framkvæmdir. „Ef þeir hins vegar neita okkur um lánið verður mun þyngra að reyna að fjármagna þetta annars staðar. Við eigum því mikið undir því að við fáum þessa fyrirgreiðslu,“ segir Hjörleifur.

Orkan frá virkjununum er ætluð álverinu í Helguvík. Fjármögnun þeirrar framkvæmdar er ólokið. „Orkuveitan gerði ráð fyrir því að fjármögnun við framkvæmdina í Helguvík yrði lokið. „Við erum því ekki með skuldbindandi orkusamning í höndunum. Þeir eru ekki tilbúnir að gefa okkur grænt ljós á að þeir kaupi af okkur orkuna fyrr en þeir hafa lokið sinni fjármögnun. Við eigum ekki von á svörum frá Norðuráli fyrr en á fyrri hluta næsta árs.“

Á meðan beðið er fundar sendinefndar Orkuveitunnar vegna afhendingar á þremur vélasamstæðum af fimm frá fyrirtækinu Mitsubishi í Japan. Afhendingu vélasamstæðanna þriggja, sem setja á niður í fyrrnefndum virkjunum og kosta samtals fimmtán milljarða, hefur verið frestað áður. „Verið er að ræða hvort seinkun á afhendingu kemur til greina eða að hugsanlega verði hætt við móttöku þeirra,“ segir Hjörleifur. „Það er verið að fá viðbrögð okkar viðsemjenda við þessum kostum og hvaða afleiðingar þeir hafi í för með sér."