Eins og alls engin lög gildi á Reykjanesinu

„Reykjanesið er sérfyrirbæri og engu líkara en að þar gildi alls engin lög,“ skrifar Níels Sigurður Olgeirsson, formaður Matvæla- og veitingafélags Íslands, í blað félagsins Matvís.

Níels segir í Matvís að siðferði í veitingageiranum sé oft á mjög lágu plani. Lenska sé hjá sumum að skipta um kennitölur og skilja eftir skuldir til birgja, leigusala og starfsfólks. Sérstaklega telur hann ástandið á Reykjanesi slæmt. „Það virðist eins og það sé regla hjá þeim að vera með mikið af svartri starfsemi í veitingabransanum,“ segir Níels við Fréttablaðið.

Í Matvís nefnir Níels dæmi um veitingamann sem illa gekk að koma böndum yfir. „Alla vega gekk lögreglunni erfiðlega að færa veitingamann í dómsal þegar hann mætti ekki þangað af fúsum og frjálsum vilja, þó svo þeir [lögreglumenn] matist þar daglega,“ skrifar Níels í blaðið.

Spurður um mál áðurnefnds veitingamanns og lögreglunnar á Suður­nesjum segir Níels við Fréttablaðið að Matvís hafi lengi verið að eltast við veitingamanninn vegna vanefnda hans við félagsmenn Matvís. Á endanum hafi verið beðið um að lögreglan sækti hann.

„Það tók held ég eitt og hálft ár að koma honum í réttarsalinn. Samt var sýslumaðurinn þarna að borða hjá honum. Reykjanesið er svolítið sérstakt því það virðist vera eins og það sé regla hjá þeim að vera með mikið af svartri starfsemi í veitingabransanum,“ segir Níels. Ekki náðist tal af sýslumanninum í Keflavík til að bera undir hann þessa lýsingu Níelsar.

Tveir starfandi veitingastaðir í Reykjavík eru nefndir á nafn í grein Níelsar sem dæmi um slæmt siðferði. „Þessi fyrirtæki skila ekki gjöldunum sem þau draga af starfsfólkinu heldur skipta bara um kennitölur þegar það er kominn tími. Þetta er gífurlegur kostnaður sem fer úr sameiginlegum sjóðum til að borga þennan þjófnað,“ útskýrir hann.

Formaður Matvís kveðst telja afar mikilvægt fyrir samfélagið allt að uppræta slíka viðskiptahætti, hvort sem er í veitingastarfsemi eða á öðrum sviðum atvinnulífsins. Setja þurfi lög sem komi í veg fyrir að hægt sé að skipta um kennitölu til þess eins að losna við skuldir. Einnig lög sem fyrirbyggi að hægt sé að koma eignum undan á meðan mál eru í rannsókn.

gar@frettabladid.is