Is it True? kosið besta lag áratugarins

„Ég fékk þessar fréttir í gær, þær komur skemmtilega á óvart,“ segir Óskar Páll Sveinsson, silfur-lagahöfundur með meiru. Íslenska Eurovision-lagið Is it True? heldur áfram sigurför sinni um Eurovision-heiminn því það var kosið lag áratugarins í netkosningu á aðdáendasíðunni esctoday.com sem er sú vinsælasta í þessum bransa. Í öðru sæti varð serbneska lagið Molitva með söngkonunni Mariju Serifovic og Rändajad frá Eistlandi hafnaði í því þriðja. Athygli vekur að norski hjartaknúsarinn Alexander Rybak kemst ekki á lista yfir 25 bestu Eurovision-lög áratugarins en hann sigraði með miklum yfirburðum í Moskvu fyrr á þessu ári.

Óskar hefur annars verið í fríi frá tónlistinni í allt sumar því laxveiðin hefur átt hug hans og hjarta. „Ég vinn inni á veturna en er í útivinnu á sumrin,“ segir Óskar sem var meðal annars leiðsögumaður í Norðurá, Laxá í Kjós og Selá í Vopnafirði. Nú þegar farið er að skyggja tekur tónlistin aftur við og lagahöfundurinn hyggst meðal annars vera með í Eurovision-keppni Sjónvarpsins í ár. Hann þurfti reyndar ekki, sem sigurvegari síðasta árs, að taka þátt í undankeppninni og segir lag sitt því ekki fullmótað.

„En annars ætti maður náttúrulega bara að hætta núna, eftir að hafa samið lag áratugarins, leiðin getur vart annað en legið niður á við eftir það,“ grínast hann með. „Maður er bara aðeins of ungur og vitlaus til þess.“ - fgg