Sjaldan veldur einn þá tveir deila

Vegna fréttar sem birtist á Vísi í gærkvöldi um slagsmál í Keiluhöllinni vill fyrirtækið taka nokkur atriði fram, þar sem ekki hafi verið greint rétt frá í fréttinni. Málið snýst um átök sem brutust út seint á föstudagskvöldið milli tveggja hópa sem voru á brautum hlið við hlið.

Í athugasemd frá Rúnari Fjelsted hjá Keiluhöllinni segir að upphaf umræddra ryskinga megi rekja til þess að stúlka og vinir hennar hafi gert stöðugar athugasemdir við framkomu þeirra einstaklinga sem spiluðu á næstu braut, sem leiddi til þess að deilur upphófust milli hópanna.

Faðir stúlkunnar sagði á Vísi í gærkvöldi að dóttir sín hefði orðið fyrir árás, svo sá á henni og félögum hennar, og gagnrýndi starfsfólk Keiluhallarinnar fyrir afskiptaleysi. Þetta segir Rúnar ekki rétt þar sem strax í upphafi hafi dyravörður komið á vettvang til að stilla til friðar. Meðal annars hafi stúlkunni og vinum hennar verið boðið að færa sig á aðra braut, en því hafi verið hafnað. Hann tekur fram að dyraverðir hjá Keiluhöllinn séu viðurkenndir af lögreglunni og komi frá fyrirtækinu Gæsla.is

„Þegar ryskingar hófust, sem greinilega orsökuðust af orðadeilum milli aðila, komu þrír aðrir starfsmenn á vettfang sem gerðu allt sem í þeirra valdi stóð til að stilla til friðar. Þá þegar var hringt á lögreglu, sem komin var á staðinn innan 10 mínútna. Það er ekki rétt sem faðir stúlkunnar (sem var ekki á staðnum) heldur fram. Að aðilar á næstu braut hafi verið, að grýta keilukúlum og hlaupa yfir brautir annarra. Þetta má sjá á myndbandi sem til er hjá Keiluhöllinni að svo sé ekki rétt," segir Rúnar í athugasemd sinni.

Ennfremur segir hann að starfsfólki og forráðamönnum Keiluhallarinnar þyki afar leitt að til þessara átaka hafi komið. Á engan hátt sé hægt að afsaka þá framkomu sem átti sér stað, en sjaldan valdi einn þá tveir deila.

„Það er afar fátítt að slíkir atburðir gerist hjá Keiluhöllinni. Miklu fremur ríkir þar gleði og ánægja hjá þeim rúmlega 200 þúsund manns sem heimsækja Keiluhöllina árlega."

Fyrrnefnda frétt frá því í gærkvöldi er hægt að sjá hér að neðan.