Fjölmenni sótti kirkjur á aðfangadagskvöld

Kirkjur á höfuðborgarsvæðinu voru fjölsóttar á aðfangadagskvöldi, segja þeir sr. Jón Dalbú Hróbjartsson prestur í Hallgrímskirkju og sr. Vigfús Þór Árnason prestur í Grafavogskirkju. Þeir eru sammála um að kirkjusókn aukist sífellt og hafi verið mikil alla aðventuna.

„Það eykst frá ári til árs framboðið af því sem boðið er upp á í kirkjunni, bæði helgihald og tónleikar," segir Jón Dalbú Hróbjartsson. Hann segir að í þeim 20 kirkjum sem eru á Reykjavíkurprófastsdæminu hafi verið 50 guðsþjónustur í gær. „Þá tel ég með það sem var auglýst á Landspítalasjúkrahúsunum,“ segir Jón.

Þeir Vigfús og Jón Dalbú segja að kirkjurnar séu alltaf þéttast setnar við aftansöng klukkan sex, en víða í kirkjum eru messur haldnar klukkan fjögur, sex og um miðnætti.