Ákærður fyrir 43 brot

Átján ára piltur sem situr í gæsluvarðhaldi á Spáni eftir að hafa verið tekinn með um fimmtán kíló af kókaíni, hefur margoft komist í kast við lögin hér á landi. Fyrir skömmu var hann ákærður fyrir 43 afbrot sem öll voru framin á innan við einu ári.

Pilturinn sem heitir Einar Örn Arason var handtekinn ásamt kærustu sinni á Barajas flugvellinum í Madríd þann 16.desember en þau voru að koma með flugi frá Perú. Eftir því sem fréttastofa kemst næst var parið með um 15 kíló af kókaíni í fórum sínum. Einar er fæddur árið 1991 og stúlkan árið 1990.

Þrátt fyrir ungan aldur er Einar með fjölmörg afbrot á bakinu. Þann 21.desember síðastliðinn átti að taka fyrir fjölmörg mál tengd Einari í Héraðsdómi Reykjavíkur. Hann er ákærður fyrir 43 afbrot sem framin voru frá september 2008 til ágúst á síðasta ári.

Einar er meðal annars ákærður fyrir að hafa stolið þremur flatskjám, farsíma, dekkjum og rakspíra, og fyrir líkamsárás í Engihjalla í Kópavogi í sumar.

Þá er hann ákærður fyrir að hafa dælt bensíni á bíl sinn í ellefu skipti án þess að greiða fyrir. Í flest öll skiptin hafði hann þá stolið númeraplötum á bílum víðsvegar um borgina og sett á sinn eiginn bíl, áður en hann dældi.

Lögregla þurfti sex sinnum að hafa afskipti af honum vegna umferðarlagabrota. Hann var í nokkur af þeim skiptum með fíkniefni í bíl sínum, og í eitt skipti keyrði hann á gangandi vegfaranda á Hverfisgötu.

Í sumar hafði lögregla svo afskipti af Einari á Blómvallagötu í Reykjavík þar sem hann var tekinn með hníf, sem lögregla gerði upptækan.

Utanríkisráðuneytið og lögregla hér á landi geta litlar upplýsingar veitt um málið, sem er alfarið á forræði lögreglunnar á Spáni. Í samtali við fréttastofu í dag sagði ræðismaður Íslands í Madríd að móður stúlkunnar hefði komið út fyrir tveimur dögum og hafi þegar hitt dóttur sína. Hann segir stúlkuna hafa það fínt miðað við aðstæður.

Parið getur átt von á þungum dómum vegna smyglsins, en fíkniefnadómar hafa verið að þyngjast á Spáni undanfarin ár.