Rúmlega þrjúhundruð manns á kröfufundi

Vel yfir þrjúhundruð manns voru samankomnir á Austurvelli vegna kröfufundar Hagsmunasamtaka heimilanna og samtakanna Nýtt Ísland.

Samkvæmt tilkynningu þá vilja samtökin hvetja alla til að mæta og gera kröfur á ríkisstjórn Íslands til að bæta lánakjör landsmanna til frambúðar með almennum og samræmdum leiðréttingum á stökkbreyttum höfuðstóli lána og afnámi verðtryggingar til frambúðar.

Samtökin hafa gagnrýnt það sem þau vilja meina að séu ósamræmdar og villandi leiðréttingarleiðir bankanna sem skila sér ekki í auglýstum prósentutölum þegar lánatíminn er skoðaður í heild sinni.

Samtökin hafa mótmælt fimm sinnum í vetur.