Vinur Steingríms rýrir trúverðugleika hans í bréfi til saksóknara

Steingrímur Wernersson sem átti fjárfestingarfélagið Milestone með Karli bróður sínum hefur undanfarin tvö ár glímt við alvarleg veikindi og ekki sinnt fjárhagslegum málefnum sínum, að því er fram kemur í bréfi lögmanns hans til embættis sérstaks saksóknara. Þetta gæti kastað rýrð á trúverðugleika vitnisburðar Steingríms.

Steingrímur Wernersson hefur stöðu sakbornings í rannsókn sérstaks saksóknara á Milestone og Sjóvá en embættið hefur frá því í júlí á síðasta ári rannsakað hvort færsla á eignum úr móðurfélaginu Milestone inn í Sjóvá á síðastliðnum tveimur árum varði við lög um hlutafélög, lög um starfsemi tryggingafélaga eða kunni hugsanlega að falla undir umboðssvik.

Sérstakur saksóknari tók skýrslu af Steingrími Wernerssyni hinn 5. júlí á síðasta ári í tengslum við rannsókn á Milestene og Sjóvá. Við skýrslutöku sakaði Steingrímur Karl bróður sinn um ýmis alvarleg auðgunarbrot, en báðir hafa þeir stöðu sakborninga í rannsókninni. Steingrímur greindi ítarlega frá samskiptum við Karl bróður sinn og sagði hann hafa útilokað sig frá rekstri Milestone, sagði hann siðblindan og kallaði hann einræðisherra.

Í bréfi sem Stefán Bragi Bjarnason, lögfræðingur og vinur Steingríms sem var jafnframt viðstaddur skýrslutökuna, sendi embætti sérstaks saksóknara hinn 3. desember síðastliðinn og fréttastofa hefur undir höndum, segir hann að Steingrímur hafi átt við talsverð veikindi að stríða og verið undir læknishendi bæði hér á landi og erlendis frá árinu 2008. Þá segir Stefán í bréfinu að Steingrímur hafi gefið út allsherjarumboð sér til handa þar sem hann hafi ekki getað sinnt fjármálum sínum sjálfur vegna veikindanna.

Þá segir Stefán í bréfinu: „Steingrímur nafngreinir fjölda manna í skýrslutökunni en þar má þó helst telja Guðmund Ólason, Karl Wernersson og Jóhannes Sigurðsson. Að auki sakar Steingrímur umrædda menn um ýmis alvarleg auðgunarbrot gegn almennum hegningarlögum. Til að taka allan vafa þar um þá deilir undirritaður ekki sömu skoðunum á ofangreindum mönnum og Steingrímur né hef ég í mínum störfum fyrir Steingrím rekist á nokkuð það efni sem styður að þeir hafi gerst sekir um brot gegn almennum hegningarlögum."

Bréf Stefáns er meðal gagna í málinu, en lögmenn sakborninga eiga rétt á öllum gögnum í síðasta lagi þremur vikum eftir að þau verða til, samkvæmt lögum um meðferð sakamála. Rannsókn sérstaks saksóknara stendur enn yfir og henni miðar vel, samkvæmt upplýsingum frá embættinu.