Kosið á ný um stækkun álvers

Gildi undirskrifta um nýja kosningu um stækkun álvers í Straumsvík hefur verið staðfest og unnið er að undirbúningi kosningarinnar. Óformlegar viðræður hafa átt sér stað á milli rekstraraðilans, Rio Tinto Alcan, og bæjarfélagsins, en formlegra svara er beðið, að sögn Lúðvíks Geirssonar bæjarstjóra í Hafnarfirði. Hann segir mögulega verða kosið um málið samhliða þjóðaratkvæðagreiðslu um Icesave.

„Ég hef átt viðræður við Rannveigu Rist, forstjóra álversins, og það liggur fyrir að álverið er að ganga frá sínum skriflegu svörum þessa dagana. Við höfum verið að skoða það í stjórnsýslu bæjarins að hafa það bak við eyrað hvort ekki verði hægt að ganga til kosninga samhliða þjóðaratkvæðagreiðslu 6. mars."

Lúðvík segir ákvörðun þar um þurfa að liggja fyrir fjórum vikum fyrir kosninguna og líklega skýrist hún á bæjarstjórnarfundi sem verður í næstu viku.

Síðast var kosið um stækkun árið 2007 og var hún þá felld. Lúðvík segir að kosningin muni snúast um hvort auglýsa eigi skipulagstillögu, sem geri ráð fyrir stækkun álversins, og leita eftir formlegum athugasemdum til að geta afgreitt hana. „Málið snýst um ferli skipulagsmálsins."

Ákveðið hefur verið að ráðast í fyrri hluta endurbóta álversins með það fyrir augum að nýta megi meira rafmagn en nú er gert. Rannveig Rist, forstjóri Alcan á Íslandi, segir viðræður við Landsvirkjun um endurnýjaðan raforkusamning, auk viðbótarorku, á lokastigi. Sú orka muni koma úr Búðarhálsvirkjun.

Um er að ræða fjárfestingu fyrir rúmar 100 milljónir dala í þessum áfanga stækkunarinnar, eða tæpa 13 milljarða króna. Alls fara um 330 milljónir dala í allt straumhækkunarverkefnið. Framleiðslugeta eykst í kjölfarið um 40 þúsund tonn, fer úr 178 þúsund tonnum í 218 þúsund tonn á ári.- kóp, óká