Gróft og niðurlægjandi myndskeið má finna á vefsíðunni Youtube af íslenskum unglingum að misþyrma öðrum pilt. Í athugasemdakerfi fyrir neðan myndbandið stendur að piltarnir séu fæddir 1995 og eru þeir því fimmtán ára gamlir. Myndbandið var sett inn á vefinn fyrir mánuði síðan.
Árásin virðist hafa átt sér stað í Keflavík, nánar tiltekið á Vatnsholti.
Myndbandið er hljóðskreytt með tónlist líkt og um eðlilegt afþreyingaefni væri að ræða en á því má sjá einn ungling ganga í skrokk á öðrum pilti. Allt í kring er hópur unglinga sem fylgist með aðförinni sem er bæði gróf og niðurlægjandi. Í einu broti myndskeiðsins má sjá þriðja piltinn blanda sér inn í áflogin og slær fórnalambið bylmingshögg í andlitið.
Að lokum nær árásarmaðurinn að snúa fórnalambið niður og lætur höggin dynja linnulaust á honum. Síðan rífur hann drenginn upp, eins og sést á myndum hér við hliðina á, og heldur áfram að slá hann ítrekað í andlitið.
Allan tímann er árásin tekin upp, sennilega á farsíma. Svo hefur hún verið sett inn á myndbandasíðuna Youtube þar sem allir geta nálgast myndbandið.
Árásin minnir um margt á alvarlega líkamsárás þar sem þrír piltar misþyrmdu yngri pilt í Njarðvík fyrir um tveimur árum síðan. Þeir piltar voru ákærðir fyrir alvarlega líkamsárás og að lokum dæmdir fyrir brotið.
Ekki er ljóst hverjir tóku myndbandið upp eða eiga hlut að árásinni sem um ræðir.
Ekki verður vísað á myndbandið hér.
