Jón Gnarr nýtt leikskáld Borgarleikhússins

Jón Gnarr leikari og skáld hefur verið valinn leikskáld Borgarleikhússins úr stórum hópi umsækjanda. Jón mun starfa í Borgarleikhúsinu næsta árið þar sem hann mun sinna ritstörfum fyrir leikhúsið.

Markmið með ráðningu leikskálds á vegum Leikritunarsjóðs Leikfélags Reykjavíkur er að laða hæfileikaríkt fólk að leikhúsinu, kynna því leikhúsformið og efla þannig íslenska leikritun, að fram kemur í tilkynningu frá Borgarleikhúsinu.

Úr umsögn dómnefndar: „Jón Gnarr hefur sýnt það og sannað með verkum sínum að hann er snjall penni sem hefur gott næmi fyrir samtalsforminu og persónusköpun. Þó húmorinn sé gjarnan í forgrunni er alvaran aldrei langt undan. Það er mikill fengur að fá þennan reynda listamann til liðs við leikhúsið."

Stefnt er að því að Jón riti leikverk, eitt eða fleiri, á tímabilinu með uppsetningu í Borgarleikhúsinu í huga. Leikskáldið verður hluti af starfsliði hússins allt tímabilið og fær aðgang að allri starfsemi leikhússins. Leikritunarsjóður Leikfélags Reykjavíkur réð fyrsta leikskáldið, Auði Jónsdóttur rithöfund, í upphafi ársins 2009 og er hún því að ljúka sínum árssamningi. Stefnt er að uppsetningu á nýju leikriti Auðar á næsta leikári.  

Formaður stjórnar Leikritunarsjóðsins er frú Vigdís Finnbogadóttir, heiðursfélagi Leikfélags Reykjavíkur. Aðrir í stjórn eru Brynjólfur Bjarnason og Magnús Geir Þórðarson, leikhússtjóri.