Gunnar leitar að Sollu Stirðu

„Það verða opnar prufur og þær fara fram laugardaginn 13. febrúar á Hilton Nordica-hóteli við Suðurlandsbraut. Hefjast stundvíslega klukkan tíu og fólk á að mæta tímanlega því við finnum fyrir miklum áhuga og búumst við miklum fjölda," segir Gunnar Helgason, leikstjóri Latabæjarskemmtunarinnar sem fram fer í Laugardalshöll hinn 27. mars.

Stelpur á aldrinum 8-28 ára geta þá mætt og reynt fyrir sér í hlutverki hinnar skeleggu Sollu stirðu en sú sem verður fyrir valinu mun hafa í nógu að snúast því næg verkefni eru fram undan hjá Latabæ á næstunni. „Við viljum gefa öllum umsækjendum nægan tíma til að láta ljós sitt skína og þess vegna verða tvær dómnefndir; Magnús Scheving og Máni Svavarsson verða auk systranna Guðfinnu og Birnu Björnsdætra. Þá mun Margrét Eir verða sérstakt tóneyra," útskýrir Gunnar.

Solla er vafalítið einhver þekktasta íslenska stelpan í heiminum í dag, fyrir utan kannski Björk, þótt ekki séu margir áhorfendur í útlöndum sem gera sér grein fyrir þjóðerni hennar. Svo skemmtilega vill til að sú sem lék Sollu áður, Linda Ásgeirsdóttir, er að leika undir stjórn Gunnars í öðru leikriti um þær Skoppu og Skrítlu.

Gunnar vildi hvetja allar stúlkur á þessum aldri til að mæta því Latibær væri alltaf að leita eftir hæfileikafólki. „Okkur vantar alltaf dansara og það er alltaf gott að vera kominn á lista." Skráning hefst á vísir.is á mánudaginn í næstu viku en hægt verður að nálgast lögin hennar Sollu á Latibær.is og Bylgjan.is.- fgg