Ekki á leið í frí

„Það er bara fullkomlega eðlilegt að hún taki örfáa daga fyrir sjálfa sig," segir Steingrímur J. Sigfússon fjármálaráðherra um frí sem Jóhanna Sigurðardóttir forsætisráðherra tók sér í morgun.

Samkvæmt heimildum fréttastofu fór Jóhanna til útlanda með sambýliskonu sinni. Steingrímur segir að Jóhanna hafi tekið þá ákvörðun í fullu samráði við sig og þau verði í daglegu sambandi.

Aðspurður hvort hann sé á leið í frí segir Steingrímur svo ekki vera. Það hafi gengið erfiðlega að finna tíma í slíkt þar sem hann þurfi stöðugt að vera í viðbragðsstöðu.

„Ég fór til dæmis tvisvar til útlanda á síðustu tveimur vikum, með aðeins sólarhringsfyrirvara."