Cheryl með sama lögfræðing og Karl Bretaprins

Allt stefnir í að hjónaskilnaður breska knattspyrnukappans Ashley Cole og söngkonunnar Cheryl verði ljótur. Þau hittust um helgina til að ræða um hvernig þau eigi að skipta sameiginlegum eignum sínu. Sá fundur endaði hins vegar með látum og hefur Cheryl ráðið stjörnulögfræðinginn Fiona Shackleton til að vinna að málinu. Fiona er einna þekktust fyrir að hafa unnið fyrir Karl Bretaprins og sir Paul McCartney þegar þeir stóðu í sínum skilnuðum.

Breskir fjölmiðlar grófu nýverið upp ástarævintýri eiginmannsins með ókunnugum stúlkum og voru nektarmyndir úr símum hans og dónaleg sms-skilaboð birt á forsíðum helstu dagblaðanna. Að endingu ákvað Cheryl að binda enda á hjónabandið.

Ashley og Cheryl, sem er söngkona í hljómsveitinni Girls Aloud og dómari í breska X-Factor, giftu sig árið 2006 og hafa verið eitt helsta stjörnupar Breta.