Viðurkennir ekki ósigur - óttast ofbeldisöldu í Írak

Óttast er að ofbeldisalda ríði yfir Írak eftir að Nouri al-Maliki, forsætisráðherra Íraks, tapaði í síðustu kosningum fyrir Ayad Allawi. Maliki hlaut 89 þingsæti í kosningunum en Allawi hlaut 91 sæti og því meirihluta á Íraska þinginu.

Maliki neitar hinsvegar að viðurkenna úrslitin og heldur því fram að um kosningasvindl sé að ræða. Samkvæmt Daily Telegraph þá hefur Maliki beinlínis hótað ofbeldi verði kosningasvindlið ekki viðurkennt.

Talsmaður Sameinuðu þjóðanna áréttaði á dögunum að kosningarnar hefðu farið löglega fram að mati Sameinuðu þjóðanna. Þá hvatti hann alla flokka til þess að virða úrslitin.

Óttast er að hryðjuverkahópar muni nýta sér þessa sundrung sem á sér stað í stjórnmálalífi Íraks. Þess má geta að hryðjuverkamenn hótuðu borgurum lífláti færu þeir að kjósa í þingkosningunum. Það breytti engu því kosningaþátttaka reyndist vera góð þrátt fyrir hótanir um ofbeldi.