Innlent

Bæjarstjóri klökknaði er sást í Grundarfjörð

Garðar Örn Úlfarsson skrifar
Alda Hlín Karlsdóttir, menningarfulltrúi Grundarfjarðar, við skiltið með franska undirnafninu á Hrannarstíg.
Alda Hlín Karlsdóttir, menningarfulltrúi Grundarfjarðar, við skiltið með franska undirnafninu á Hrannarstíg. Mynd/ Tómas Freyr Kristjánsson
„Þessi tengsl eiga sérstaklega djúpar rætur í hugum Frakkanna,“ segir Alda Hlín Karlsdóttir, menningarfulltrúi Grundarfjarðar, um nýlega heimsókn sendinefndar franska vinabæjarins Paimpol.

Grundarfjörður og Paimpol tóku upp vinabæjarsamband fyrir tíu árum en tengsl þeirra ná hins vegar allt aftur til átjándu aldar er sjómenn frá Paimpol sigldu til þorskveiða við Íslandsstrendur. Talið er að allt að þrjú þúsund menn frá Paimpol hafi týnt lífi í þessum ábatasömu en áhættusömu leiðöngrum.

„Franski bærinn byggist upp á auði héðan úr Grundarfirði. Þeir eru miklu meðvitaðri um tengsl bæjanna og vináttan er þeim afar dýrmæt. Þetta ætlum við að styrkja enn frekar og efla,“ segir Alda Hlín.

Sendinefnd úr Grundarfirði fór utan í mars þar sem Alda Hlín kveður höfðinglegar móttökur hafi beðið Íslendinganna. Um þar síðustu helgi endurguldu Frakkarnir heimsóknina. Auk þess sem formlegt vinabæjarsamband hefur verið með bæjunum í tíu ár, sem nú var haldið sérstaklega upp á, er sjálfstætt starfandi vinafélag milli íbúa í bæjunum, Grundapol.

Gunnar Bragi Sveinsson utanríkisráðherra, Anne Smith, opinber listamaður franska sjóhersins, Einar K. Guðfinnsson, forseti Alþingis, Lionel Tardy, þingmaður frönsku útlendingadeildarinnar, Marc Bouteiller, sendiherra Frakka á Íslandi, Björn Steinar Pálmason, bæjarstjóri Grundarfjarðar, Annie Mobuchon, staðgengill bæjarstjóra Paimpol og Jean-Yves de Chaisemartin, bæjarstjóri Paimpol. Mynd/Grundarfjörður
Bæjarstjóri Paimpol, Jean-Yves de Chaisemartin, fór fyrir Frökkunum sem heimsóttu Grundarfjörð. Þeir hlýddu meðal annars á sinfóníutónleika frönsk-íslensku vinabæjarhljómsveitarinnar FIFO á sunnudag og farið var í hringferð um Snæfellsnes.

„Þegar við komum akandi til baka og sást í Grundarfjörð þá klökknaði franski bæjarstjórinn er honum varð hugsað til sögunnar sem tengir bæina saman. Íslandsferðirnar voru gríðarleg blóðtaka fyrir Paimpol en byggðu jafnframt upp bæinn á þeim tíma.“

Auk þess sem Eldfjallasafnið var heimsótt og bragðað á hákarli í Bjarnarhöfn var bæjarstjóranum gefin eftirmynd af franskri fallbyssu sem fannst við Kirkjufell. Síðast en ekki síst fékk gatan Hrannarstígur undirnafnið Rue de Paimpol í virðingarskyni við gestina. Í Paimpol er reyndar gata sem ber heitið Rue des Islandais Grundarfjörður.




Fleiri fréttir

Sjá meira


×