Barnabarn Yoda ?

Í frásögn Fox fréttastofunnar af þessum atburði er ekki getið um hvort stúlkan sem þar kemur við sögu er frá "Vetrarbraut langt, langt í burtu." Eða hverra manna hún er. En Fox segir frá því að maður var handtekinn fyrir að reyna tvisvar að ræna smávöruverslun í Kalamazoo sýslu í Michigan um síðustu helgi.

Hann kom fyrst inn og sagði við afgreiðslustúlkuna að hann ætlaði að ræna verslunina. Hún brást við með því að veifa lófanum í hring fyrir framan andlit hans og segja: „Þú ætlar ekki að ræna verslunina." Honum brá svo að hann hrökklaðist út.

Skömmu síðar kom hann inn aftur og sagðist nú vera með vopn í vasanum. Stúlkan sagði þá að lögreglan væri á leiðinni og aftur hrökklaðist hann út. Lögreglan átti þó ekki í neinum vandræðum með að finna hann í bíl sínum skammt frá versluninni. Hann situr nú í fangelsi í Kalamazoo. Mátturinn er greinilega með þessari stúlku.